شعر طنز ترکی به مناسبت شب یلدا

شعر طنز ترکی به مناسبت شب یلدا

چیلله گئجه‌سی!

چیلله گئجه سی یئتیشدی یولدان

فامیل توکولوبدو  ساغ و سوْلدان

مش قوربانعلی  دوشوبدو  قولدان!

دورد اللی یئییر جویز - میلاخ دان!

آرواد گؤز آغاردیری قیراخ دان!

سئفرایه ائدیبدی حمله شیر تک

تئز تئز یئییری  انار و پشمک

آجیللره هی ووروبدو پاتک

باخمیر کی فیشاری قالخیب اوسته

تکجه سئچیری باداملا پوسته !

چون سینی ایچینده گلدی قارپیز

قوربان دئدی : گل بو سمته آی قیز!

قَش- قَش یئدی قارپیزی  آمانسیز

هیچ کیمسه آلانمادی الین‌دن

قارپیز سویو آخدی سققلین‌دن!

مجلس  صاحابی سوُسوُب، قالیب واه!

گاهدان گولورو: دئییر ماشاللاه!

قلبینده دئییر ولی : آی آللاه!-

دورد اللی بوجور یئمک  نه ایشدیر؟

واه واه بو کیشی نه گورمه‌میشدیر!

بیر کیمسه یه وئرمیری ماجالی

تئز تئز سوْیور آلما-پرتقالی

تا که گؤرور ائو صاحاب بو حالی

هی هیرسله چئینیری  دوداغین:

آی قارنی شیشه بوجور قوناغین!

ازبس یئدی ، دال‌بادال چای ایشدی

قارقیش اوخو  مقصده یتیشدی!

تیخماق اثرین‌ده  قارنی شیشدی!

بیردن بیره ناله‌سی اوجالدی

مجلس صاحابی خطایه  قالدی!

رواد دئدی : ای وای اؤلدو قوربان!

دوُر ماشینی فوری  یاندیر  اوغلان!

تا که آپاراق مطبّه الآن

یئردن اونو قووزادی   قوناقلار

آلدی بئلینه اوغول  به‌ناچار

ایستیردی چیخا اتاق‌دان   اوغلان

ائتدی اَلیله  اشاره قوربان

گوردو آتاسی دئییر یاواشدان:

اوچ -دؤرد تیکه حالوا اولسا خوشدور!

معده‌م دئیه‌سن بیر آزجا بوشدور!!

سعید_سلیمان_پور

@bolfozool